عجبى !

بحر ارتطم موجه كسر فى صخورى.
و صاعقة نازلة من السما على راسى…
فتفت دماغى هم… قاللى غرورى.
أكتب همومى فوق ورق كراسى.
عجبى

جميع أمالك يا فراشة تطيرى.
و ترفرفى على ورد خده حريرى.
مسكت جناحاتك دابت ف إديا.
ما اعرفش ليه خليتها شكل ضميرى!
عجبى

مش هاشتكى عذابات تزيد تعذيبى.
و افهم جروحى و تبقى روحى طبيبى .
وان كت أهاتى لوحة سريالية .
و ألامى طلسم منغلق تكعيبى.!
عجبى

مش مشكلة تخسر كتير و قليل.
و لو قسى مرة الزمان ماهو عيل.
يقسى و يصفى بين دقيقة و ثانية.
لو مال ..أكيد ….ماهو ياما حن وميل!
عجبى

الفرح قال للحزن: إيه اللى بيك.
قال له : حبايبى قلو .زادو عليك.
الفرح قال :ما اقدرش أحزن ولا….
أتهنى وانت حزين بالفرحة فيك.!
الفرح قال للحزن: إيه اللى بيك.
عجبى

قال له : حبايبى قلو .زادو عليك.
الفرح قال :ما اقدرش أحزن ولا….
أتهنى وانت حزين بالفرحة فيك.!
عجبى

على كل شكل ولون لسان بيلاغى.
حتى السكوت له وش جوة دماغى.
بس الزمن ولسانه باعشق صوته.
أصله ان ما جبش ودانى بيجيب داغى.
عجبى

كل الحكاية بس خطوة جريئة .
إوعى تعيش الخوف ولو لدقيقة .
أصلك إذا خفت ..السلامة ف خوفك…
كدبة…و موتك بالشجاعة حقيقة !
عجبى

سابق ولا تبصش على اللى قبلك .
لتقع ويضحك مين وراك على هبلك .
لا تلوم زمان على اللى شفته ف عمرك .
إن خد كتير منك ماهو كتير ساب لك .!
عجبى

يا رب خلى الحب للأحباب .
وكالة من غير باب ولا بواب.
و ان يوم حكمت بقتل حب كبير….
خليه بلاش بالغدر .بالقبقاب
عجبى

العقل قال لو شلت راعى كتافك.
غير ف وصف الشيلة مش أوصافك
مين اللى قال من طول عذابك زود.
على قد طول الرجل طول ف لحافك؟
عجبى

رايح و جى و لسة رايح تانى
يا خطوة واخدانى لفين واخدانى؟
بتقولى :إسانى .يا خطوة بسطوة.
إنسانى ايه؟ظلمك ماهوش إنسانى
عجبى

اخترت تمشى فى الطريق السهل.
و قفلت باب عقلك و كان ع البهل.
و سبت قلبك خام و أبيض فاضى…
طفل ف ايديك عاش ثانيتين بقى كهل
عجبى

الست نار من نور .نهار واتوضا.
والست رعب و خوف و طاسة الخضة.
هى لورود و الشوك .دى مرة و حلوة .
السم و الترياق ف كاس من فضة.
عجبى

كل اما اقول لك طب تعالى تقوللى.
ايه ليك و ايه بعد اللى ليك هيكون لى؟
إن خدت منك كل حاجة كفاية ….
قلبى يحبك… يبقى خدتنى كلى.
عجبى

ياللى يئست تلاقى فرحة جديدة.
ف العسر يسر و ف النواح تغريدة…
الدنيا من ده على ده ساعة وساعة…
والحزن بيقول لما ييجى ..((سعيدة))
عجبى

وسألتنى للزهد ايه وداك ؟..
دى شيطنة ولا انت يعنى ملاك ؟..
وقلت لك : ان الحياة وردة …….
وانا قلبى ما بيقدرش ع الأشواك
عجبى

سألت عراف الزمان الجى…
جايبلى ايه وياه ..ضلام أو ضى..
قاللى:الزمن يا ابنى معاه الاثنين…
يشويك على الجنبيبن لتطلع نى …
عجبى

سألت موج البحر ليه على راحته .
مركب غرق منك وغيره جرحته .
قال :لمتو ليه الموج على جبروته.?
إن كان على..شوفو الطوفان من تحته.
عجبى

قال الجبان :امتى الأمان يملا الفضا ف الصدر؟
قال البخيل :همى التقيل .عمر الغنى بيمر.
قال الكسول : أنا مش ملول.لكن عنبكم مر .
قال الجميع :لازم هضيع لو بدلونى بحر.
عجبى

البرج قال للكوخ :سوفاج يا قصير.
إزاى تعي الخلق جوه حصارك؟
قال له :كفاية الحب فيا بيكبر.
وانت العداوة مبرطعة ف ادوارك.
عجبى

شفنى حزين سرحان فقال : ما تروق .
كان هو بلياتشو قديم ف السيرك.
نفسك فى حزن ؟ احزن قليل ع الضيق.
و ان جيت تموت ..اضحك و موت م الضحك

عجبى

مستنى إيه علشان تقوم و تجينى؟ بعدك جراح و أنين بيملا سنينى . أحتاج إليك!..ألاقيك تقول :محتاجلك . عاوزك تعديلى !..تقول :عدينى
عجبى