إقتصاد
عنيكي..
الشاعر: سيد محمود
عنيكي دي كل أحبابي
تصبرني على ما بي
يا فرح القلب يا أجمل حكاياته
يا ضحك العمر
وايامه وساعاته.غلبني الشوق..
و دار بيا الزمن تاني
و رجعني أدوب فيكي أحزاني
وجابني ف الغرام عندك
ووداني
بشوقي بعيد
حزين على حالي متصعب.. وقلبي سعيد
ينادي ع اللي راح…..يرجع
ويسكت كل شيئ في الكون عشان يسمع
دبيب الحب في قلبي
و صمت الصرخة جوايا
ويبقى حرف ف حكايتي
بألف حكاية و حكاية
و تسهر لك عيون قلبي
بدمع الفرح بكاية
ولا شكوى هيسمعها
حبيبي ولو تكون الدنيا من حوالينا شكاية
أنا و هواكي جوايا
باحس الدنيا و الأفراح هنا جنبي
وريحة السعد في قلبي… تفوح انوار
و تطرح شمعتي أزهار
و ادوب في بحر أشواقي
ويصعب كل عاشق ف الهوى عليا
عشان نفسه يكون زيي و مش لاقى
هنا أد اللي انا شايفه
ابعتر فرحتي ع الكون
يدوب صخر الأسى فرحة
وتبقالي السما طرحة….على توللي
يغني الكون بنغمة جميلة و يقول لي…..
عنيكي دي كل أحبابي
تصبرني على ما بي ………
