كلمتين ونص!
بقلم: إيمان شلبى
واحنا صغيرين في المدرسة، كنا بنقول الفرق بين طفل وطفل هو تربيه ام – الام هى اللي بتربي وتحضن وتحتضن.. تلم وتشمل بالعاطفه وتفرز راجل حنين وقوى ويُعتمد عليه..
كان دورها واضح وصريح وكان في اب حنين وقوى يحتوى الام والأبناء ولما كتر الكلام والانفصال وبقت الام اب، والاب ام ، وبقي الصراع داير بينهم غفلوا عن العيال يا اما لطلب الرزق او للبحث عن حياه اخرى يعتقدوا فيها السعادة.. وطلعوا طفل عنيد عصبي كاره للدنيا بيدور ازاى يطلع كرهه في اللي حواليه، انتقامي من اللي ظلموه وهو صغير بلا حول منه ولا قوة !
اخدوا قرار أنانى بالانفصال ولم يراعوا رغبات الأطفال اللي لو اتسالوا كانوا رفضوا وقالوا ايه الذنب اللي عملناه وتركنا الابناء للسوشيال ميديا اللي جايه من بعيد بأخلاق ومعتقدات تانيه بعيده عن مجتمعنا بيشوفها الولاد والى جرتهم وجرجرتهم وجرتنا معاهم لعالم من الوحشه والعنف.
أصبح الرقص والعُرى في الفديوهات مباراه بين البنات.. ودا كله بدون رقيب من العيله والأسرة اللي ماعادت اسرة بقى مربع ناقص ضلع وفقد صفته كضلع.
يا إباء.. يا أمهات.. يا جدات.. يا اجداد.. اتعاملوا بالعقل مع المشاكل بين الزوجين لملموا.. ماتفرقوش اهدوا.. ماتولعوش.. حكموا العقول بلا عناد..نظرة عطف وحنان للابناء لان مستقبل الأبناء اهم من انانيه الاباء.
وللحديث بقية إن شاء الله.
